Bugungi globallashuv sharoitida yosh avlodni har tomonlama yetuk, jismonan sog’lom va yuksak ma’naviyatli etib tarbiyalash davlat siyosatining ustuvor yo’nalishlaridan biri hisoblanadi. Ushbu oliy maqsadlar ijrosini ta’minlashda «Vatanparvar» tashkiloti Ohangaron shahar O’quv sport texnika markazining samarali faoliyati alohida e’tirofga loyiq. Mazkur muassasa o’z Nizomi doirasida O’zbekiston Respublikasi Qurolli Kuchlarining mudofaa salohiyatini mustahkamlashga ko’maklashish, fuqarolarni, ayniqsa, yoshlarni Vatanga sadoqat ruhida tarbiyalash hamda ularni harbiy xizmatga va texnik kasblarga tayyorlash borasida tizimli ishlarni amalga oshirib kelmoqda.
Markaz faoliyatida harbiy-vatanparvarlik, ma’naviy-ma’rifiy va sport-sog’lomlashtirish yo’nalishlari o’zaro uyg’unlikda olib boriladi. Xususan, yoshlarning qiziqishlaridan kelib chiqqan holda sportning texnik va amaliy turlari bo’yicha tashkil etilgan to’garaklar o’g’il-qizlarning jismoniy imkoniyatlarini kengaytirish bilan birga, ularda mustahkam iroda va matonat tuyg’ularini shakllantirishga xizmat qilmoqda. Muntazam ravishda o’tkazib kelinayotgan sport musobaqalari va ko’rik-tanlovlar yoshlarning ijtimoiy faolligini oshirishda muhim omil bo’lmoqda.
Shu bilan birga, tashkilot tomonidan yoshlarni harbiy xizmatga tayyorlash, davlat hokimiyati organlari va ta’lim muassasalari bilan hamkorlikda harbiy-amaliy tadbirlarni tashkil etish jarayonlariga ham jiddiy e’tibor qaratilgan. Bu borada avtomototransport vositalari haydovchilarini tayyorlash va ularning malakasini oshirish tizimi samarali yo’lga qo’yilgan bo’lib, bu yoshlarning mehnat bozorida talab yuqori bo’lgan mutaxassisliklarni egallashlariga xizmat qilmoqda.
Shuningdek, ijtimoiy sheriklik tamoyillari asosida yoshlarni turli yot g’oyalar ta’siridan himoya qilish, ularda sog’lom turmush tarzini qaror toptirish va xalqaro sport maydonlarida yurtimiz nufuzini munosib himoya qilishga qodir sportchilarni tarbiyalash markazning doimiy diqqat markazida bo’lib qolmoqda.
Gulchehra ABDULHAKOVA,
«Vatanparvar» tashkiloti shahar O’STMning harbiy vatanparvarlik yo’nalishi mutaxassisi.
