Kuni kecha shahrimizda navbatdagi sayyor qabul bo’lib o’tdi. Xalq qabulxonasi binosida tashkil etilgan ushbu uchrashuvda shahar hokimi Sadriddin Shoqosimov fuqarolar bilan yuzma-yuz muloqot olib bordi. Qabul davomida 25 nafardan ortiq fuqaroning turli yo’nalishdagi murojaatlari ko’rib chiqildi. E’tiborlisi, har bir murojaat ortida muayyan muammo, ehtiyoj va umid mujassam edi. Ish bilan ta’minlash, uy-joy ajratish, moddiy yordam olish kabi ijtimoiy masalalar asosiy o’rinni egalladi. Shuningdek, ta’lim tizimidagi muammolar, yoshlar bandligi, kadastr bilan bog’liq masalalar, sog’liqni saqlash xizmatlari sifati hamda hududlarni obodonlashtirish va tozaligiga oid murojaatlar ham ko’tarildi.
Mazkur sayyor qabul yana bir bor shuni ko’rsatdiki, rahbar va xalq o’rtasidagi ochiq muloqot muammolarni hal etishning eng samarali yo’lidir. Eng muhimi, har bir murojaat ortida turgan inson taqdiri e’tibordan chetda qolmayapti. Bunday uchrashuvlar aholining davlat idoralariga bo’lgan ishonchini mustahkamlab, jamiyatda ijtimoiy adolat va ochiqlik muhitini qaror toptirishga xizmat qilmoqda.
Nozima OPPOQOVA.
