Ohangaronda har yili davom etayotgan bir go‘zal an’ana bor — «Ohangaronsement» MCHJ tomonidan «8-dekabr — Konstitutsiya kuni» arafasida eng yaxshi o‘qituvchini e’zozlash. Bu yil ushbu yuksak e’tirof, shu bilan birga, «Onix» rusumli avtomobil sovg‘asi ham shahrimizdagi 5-umumta’lim maktabining fidoyi o‘qituvchilaridan biri Mahliyo Yo‘ldoshevaga nasib etdi.
Biz g‘olib o‘qituvchi bilan uning faoliyat yo‘li, hayajonlari va maqsadlari borasida suhbatlashdik.
— O‘qituvchilik yo‘lini tanlashingizga nima turtki bo‘lgan? — O‘qituvchilik kasbini tanlashimga eng katta sabab kimyo fani o‘qituvchim, ustozim Holisa Yo‘ldoshevaning mahorati bo’lgan. Hali ham bilmaganlarimni ulardan so’rab turaman. Bundan tashqari, oilamizda ustozlar juda ko’p: bobom Ahad Davronov o‘qituvchi bo’lgan, buvijonim ona tili va adabiyotdan dars berganlar. O’ylaymanki, bu kasb menga avloddan-avlodga o’tgan bir tuyg‘u sifatida meros bo’lgan.
— Maktabda necha yildan buyon faoliyat yuritasiz? Qaysi fandan dars berasiz? — Mazkur maktabda 2007-yildan buyon faoliyat yuritaman. Oliy toifali kimyo fani o’qituvchisiman. Yillar davomida ko‘plab shogirdlarim respublika fan olimpiadalarining shahar va viloyat bosqichlarida g‘olib bo‘lishgan. Yaqinda ham viloyatda yuqori o‘rinlardan birini egalladik. Shuningdek, ayrim o‘quvchilarim bugun Toshkent Tibbiyot akademiyasi talabalaridir.
— Dars jarayonida sizningcha eng samarali usul qaysi? — Eng avvalo, har bir o‘quvchining yashirin qobiliyati, o‘ziga xos bir iste’dodi bo‘ladi. Ustozning vazifasi o‘sha qobiliyatni uyg‘otish. O‘quvchi darsga qiziqmayotganini ko‘rsam, ko‘nglim og‘riydi, har bir o‘quvchini jalb qilishga harakat qilaman. Doim «o‘qinglar» deyman, hayotdan misollar keltiraman, motivatsiya beraman.
— «Yil o‘qituvchisi» bo‘lishni kutganmidingiz? — Yo‘q, ochig‘i umuman kutmagandim. Tanlovdagi barcha ishtirokchilar kuchli edi. Natija e’lon qilinganda juda hayajonlandim. «Ohangaronsement» tomonidan mashina sovg‘a qilinganini eshitganda, to‘g‘risi yig‘lab yubordim. O‘sha paytgacha tortgan mashaqqatlarim xuddi kino tasmasiday ko‘z oldimdan o‘tdi.
— Haqiqiy ustozni boshqalardan ajratib turadigan fazilati nima? — Haqiqiy ustoz nafaqat o‘rgatadi, balki ilhom beradi. Biz bolalar bilan ishlaymiz. Bu qalb va yurak bilan ishlash degani. Har bir o‘quvchining ichida bir iste’dod bor, uni ochib bera olgan ustozgina haqiqiy ustozdir.
— O‘quvchilarga qimmatli maslahat bersangiz… — Faqat o‘qinglar. Chin yurakdan, qalbdan o‘qinglar. Ilm insonning eng katta boyligi, uni hech kim olib qo‘ya olmaydi. Ilmli kishi hech qachon xor bo‘lmaydi.
Nozima OPPOQOVA suhbatlashdi.
