Bugungi kunda mamlakatimizda ijtimoiy himoya tizimi mutlaqo yangi bosqichga ko‘tarilib, har bir insonning qadri, uning turmush tarzi va sog‘lig‘i davlatning doimiy e’tiborida bo‘lib kelmoqda. Bu boradagi islohotlarning amaliy ifodasini shahrimiz hududidagi ijtimoiy obyektlar faoliyatida ham yaqqol ko‘rish mumkin. Yaqinda Ijtimoiy himoya milliy agentligi direktori Mansurbek Olloyorovning hududga tashrifi ham aynan aholiga ko‘rsatilayotgan ijtimoiy xizmatlar sifatini oshirish, mavjud tizimdagi muammolarni bartaraf etish va reabilitatsiya jarayonlarini zamonaviy standartlar asosida tashkil etish maqsadiga qaratildi.
O’rganishlar davomida asosiy e’tibor shahrimizda joylashgan «Muruvvat» nogironligi bo’lgan shaxslar uchun erkaklar internat uyiga qaratildi. Mazkur muassasada vasiylikka olingan shaxslar uchun yaratilgan shart-sharoitlar ko’zdan kechirilar ekan, faqatgina tibbiy yordam bilan cheklanib qolmasdan, ularni ijtimoiy hayotga moslashtirish masalasi kun tartibidagi eng muhim vazifa sifatida belgilandi. Xususan, internat uyida yo’lga qo’yilgan mehnat terapiyasi loyihalari alohida e’tirofga loyiq.
Muloqotlar davomida internat uyining bino va inshootlarini bosqichma-bosqich rekonstruksiya qilish, bu yerda yashovchilar uchun yanada munosib, xavfsiz va shinam muhit yaratish bo’yicha aniq vazifalar belgilab olindi. Tashrifning mantiqiy davomi sifatida shahrimizdagi Ijtimoiy qo’llab-quvvatlash markazidagi faoliyat ham atroflicha tahlil qilindi. Bugungi kunda ushbu markazda «Faol hayotga qadam» dasturi doirasida 31 nafar fuqaroga kompleks tibbiy-ijtimoiy reabilitatsiya xizmatlari ko’rsatilmoqda.
Agentlik rahbari tomonidan markazdagi reabilitatsiya jarayonlarini samarali tashkil etish, xizmatlar ko’lamini kengaytirish va har bir murojaatchiga individual yondashuvni kuchaytirish bo’yicha mas’ullarga tegishli ko’rsatmalar berildi. Kelgusida tizimni yanada takomillashtirish orqali muhtoj qatlamning har bir vakili o’zini yolg’iz his etmasligiga erishish ustuvor yo’nalish bo’lib qoladi.
