Hozirgi kunda internet deyarli hammamizning hayotimizga kirib bo’lgan. Ayniqsa, yoshlar uchun u kundalik odatga aylangan – kimdir dars qiladi, kimdir video ko’radi, yana kimdir ijtimoiy tarmoqlarda vaqt o’tkazadi. Hatto bir kun internetsiz qolib ko’rsak, nimadir yetishmayotgandek bo’ladi.
Aslida, internetning foydasi juda ko’p. Oldin biror ma’lumot topish uchun kutubxonaga borish, kitob izlash kerak edi. Hozir esa telefonni olib, bir necha soniyada kerakli narsani topish mumkin. Onlayn darslar, turli kurslar, video darsliklar – bularning barchasi yoshlarning bilim olishini ancha osonlashtirdi. Bundan tashqari, internet orqali odamlar bir-biri bilan tez aloqa qiladi. Uzoqda yashayotgan do’stlar yoki qarindoshlar bilan gaplashish juda oson.
Lekin hamma narsaning yaxshi va yomon tomoni bo’lgani kabi, internetning ham salbiy tomonlari bor. Eng katta muammo – vaqtni behuda sarflash. Ko’pchilik «faqat 5 daqiqa» deb kiradi, lekin soatlab qolib ketadi. Yana bir muammo yolg’on va chalg’ituvchi ma’lumotlar. Hammasiga ham ishonish to’g’ri emas. Shuning uchun internetdan oqilona foydalanish kerak. Uni foydali maqsadda ishlatsak, u katta yordam beradi.
Xulosa qilib aytganda, internet ikki tomoni bor vosita. Uni qanday ishlatish esa o’zimizga bog’liq.
Xumora HASANOVA,
Jamoat xavfsizligi universiteti talabasi.
